അമേരിക്കയിലെ പ്രൊഫഷണലുകളെ ഫൊക്കാനയുടെ ഭാഗമാക്കുന്നതിന്റെ ഭാഗമായി കാനഡയില്‍ നിന്നുള്ള ഡോ. ക്രിസ്‌ല ലാലിനെ ഫൊക്കാന 2026- 28 കാലയളവില്‍ ഫൊക്കാന യൂത്ത് പ്രതിനിധിയായി മത്സരിപ്പിക്കുന്നുവെന്ന് ഫൊക്കാന പ്രസിഡന്റ് സ്ഥാനാര്‍ത്ഥി ലീല മാരേട്ട് അറിയിച്ചു.
ബ്രോക്ക് യൂണിവേഴ്‌സിറ്റിയില്‍ നിന്ന് മെഡിക്കല്‍ സയന്‍സില്‍ ഡിഗ്രിയും, സെന്റ് ജോര്‍ജ് യൂണിവേഴ്‌സിറ്റിയില്‍ നിന്ന് മെഡിക്കല്‍ ബിരുദവും നേടിയിട്ടുള്ള ക്രിസ്‌ല ലാല്‍ ഔദ്യോഗിക രംഗത്തിനു പുറമെ സാമൂഹിക- സാംസ്‌കാരിക മേഖലകളിലെ നിറസാന്നിധ്യവുമാണ്.
ബ്രോക്ക് മലയാളി അസോസിയേഷന്‍ ഇവന്റ് കോര്‍ഡിനേറ്റര്‍, തുടര്‍ന്ന് പ്രസിഡന്റ് എന്നീ നിലകളില്‍ പ്രവര്‍ത്തിച്ചിട്ടുള്ള ഡോ. ക്രിസ്‌ല ലാല്‍ നയാഗ്രാ മലയാളി അസോസിയേഷന്‍, നയാഗ്രാ സീറോ മലബാര്‍ ചര്‍ച്ച് എന്നിവയുടെ യുവജന പ്രതിനിധിയായും പ്രവര്‍ത്തിച്ചിട്ടുണ്ട്. 2020-ല്‍ 'തിലകം' എന്ന പേരില്‍ ഒരു സാംസ്‌കാരിക പരിപാടിക്ക് നേതൃത്വം നല്‍കി. മലയാളത്തിന്റെ സാംസ്‌കാരിക പെരുമ വളര്‍ത്തുന്നതിനും, സാമൂഹിക ഐക്യം നിലനിര്‍ത്തുന്നതിനുംവേണ്ടി രൂപപ്പെടടുത്തിയ 'തിലകം' പരിപാടിക്ക് കാനഡ മലയാളികളില്‍ നിന്നും വലിയ പിന്തുണ ലഭിച്ചിരുന്നു.
ആതുര സേവന രംഗത്ത് നില്‍ക്കുമ്പോഴും സാമൂഹിക- സാംസ്‌കാരിക രംഗത്തും സജീവമാകുന്ന ക്രിസ്‌ല നല്ലൊരു നര്‍ത്തകി കൂടിയാണ്.
വിവിധ തലങ്ങളില്‍ പ്രശോഭിക്കുന്ന ഡോ. ക്രിസ്‌ല ഫൊക്കാനയ്ക്കും ഒരു മുതല്‍ക്കൂട്ടായിരിക്കുമെന്നതില്‍ യാതൊരു സംശയവുമില്ല. ഇപ്പോഴത്തെ കമ്മിറ്റിയില്‍ യൂത്ത് പ്രതിനിധിയായും, ഫൊക്കാന ഹെല്‍ത്ത് ക്ലിനിക്ക് കോര്‍ഡിനേറ്ററുംകൂടിയാണ് ക്രിസ്‌ല.
