വാഷിംഗ്ടൺ ഡി സി: വാഷിംഗ്ടൺ ഡി.സി.യിൽ അഫ്ഗാൻ പൗരൻ രണ്ട് വെസ്റ്റ് വിർജീനിയ നാഷണൽ ഗാർഡ് അംഗങ്ങളെ വെടിവച്ച സംഭവത്തെത്തുടർന്ന്, യുണൈറ്റഡ് സ്റ്റേറ്റ്സിൽ നിന്നുള്ള "ഇസ്ലാം" കുടിയേറ്റക്കാരെ നിരോധിക്കാനും നാടുകടത്താനും സെനറ്റർ ടോമി ട്യൂബർവില്ലെ ബുധനാഴ്ച സർക്കാരിനോട് ആവശ്യപ്പെട്ടു.
"ഡി.സി.യിൽ രണ്ട് നാഷണൽ ഗാർഡ് ഭടൻമാരെ വെടിവച്ച അഫ്ഗാൻ ഭീകരനെ ജോ ബൈഡൻ ഇരുകൈകളും നീട്ടി ഈ രാജ്യത്തേക്ക് സ്വാഗതം ചെയ്തു, എല്ലാ ഇസ്ലാമിക കുടിയേറ്റക്കാരെയും ഉടനടി നിരോധിക്കുകയും, ആക്രമിക്കാൻ കാത്തിരിക്കുന്ന നമ്മുടെ ഇടയിൽ താമസിക്കുന്ന എല്ലാ ഇസ്ലാമിസ്റ്റുകളെയും നാടുകടത്തുകയും വേണം," ട്യൂബർവില്ലെ സോഷ്യൽ മീഡിയ പ്ലാറ്റ്‌ഫോമായ എക്‌സിലെ പോസ്റ്റിൽ കുറിച്ചു.
അഫ്ഗാനിസ്ഥാനിൽ നിന്നുള്ള കുടിയേറ്റം അനിശ്ചിതമായി നിർത്തുമെന്ന് യുഎസ് സിറ്റിസൺഷിപ്പ് ആൻഡ് ഇമിഗ്രേഷൻ സർവീസസ് (യുഎസ്‌സിഐഎസ്) പറഞ്ഞതിന് പിന്നാലെയാണ് ട്യൂബർവില്ലെയുടെ പരാമർശം. 2021-ൽ താലിബാൻ ഏറ്റെടുത്തതിനെത്തുടർന്ന് അഫ്ഗാനിസ്ഥാനിൽ നിന്ന് പലായനം ചെയ്ത അഭയാർത്ഥികളുടെ കേസുകൾ പുനഃപരിശോധിക്കാൻ പ്രസിഡന്റ് ട്രംപ് തന്റെ ഭരണകൂടത്തോട് ആവശ്യപ്പെട്ടു.
വെടിവെപ്പ് നടത്തിയതായി സംശയിക്കുന്ന 29 കാരനായ റഹ്മാനുള്ള ലകൻവാൾ 2021 സെപ്റ്റംബറിൽ "ഓപ്പറേഷൻ അലൈസ് വെൽക്കം" വഴി അമേരിക്കയിലെത്തി എന്ന് ട്രംപ് ഉദ്യോഗസ്ഥർ പറഞ്ഞു. ബൈഡൻ കാലഘട്ടത്തിൽ 20 വർഷത്തെ യുദ്ധത്തിൽ യുഎസിനെ സഹായിച്ച അഫ്ഗാൻ അഭയാർത്ഥികളെ ആണ് അമേരിക്കക്ക് കൊണ്ടുവന്നത്.
വെടിവയ്പ്പിനുശേഷം അഫ്ഗാനിസ്ഥാനിൽ നിന്നുള്ള കുടിയേറ്റക്കാർക്കെതിരെ നടപടിയെടുക്കണമെന്ന് ആവശ്യപ്പെട്ട നിരവധി റിപ്പബ്ലിക്കൻമാരിൽ ട്യൂബർവില്ലെയും ഉൾപ്പെടുന്നു.
“ജോ ബൈഡൻ പതിനായിരക്കണക്കിന് അഫ്ഗാനികളെ നമ്മുടെ രാജ്യത്തേക്ക് കൊണ്ടുവന്നു,” പ്രതിനിധി ജിം ബാങ്ക്സ് എക്‌സിൽ പോസ്റ്റ് ചെയ്തു. “ഇന്ന്, ഇതിന് ഭയാനകമായ പ്രത്യാഘാതങ്ങൾ നമ്മൾ നേരിടുന്നു. ‘ഓപ്പറേഷൻ അലൈസ് വെൽക്കം’ എന്നതിന്റെ ഭാഗമായി ജോ ബൈഡൻ അനുവദിച്ച എല്ലാ അഫ്ഗാനികളെയും ഉടൻ കണ്ടെത്തി പരിശോധിക്കാൻ ഹോംലാൻഡ് സെക്യൂരിറ്റി സെക്രട്ടറി ക്രിസ്റ്റി നോമിനോട് അഭ്യർത്ഥിക്കുന്നു.”
