അധികാരവും ഒരു ലഹരിയാണ്. ആ ലഹരിയിൽ ജനസേവനം കേവലം കാട്ടി കൂട്ടലുകൾ മാത്രമായി മാറുന്നോ എന്ന ചോദ്യത്തിന് പ്രസക്തി ഏറെയുണ്ട്. അധികാരത്തിൽ ഉയർച്ച മാത്രം ലക്ഷ്യമാക്കുമ്പോൾ ഒരേ സമയം പല പദവികൾ വഹിക്കുന്ന നേതാക്കന്മാർ നാടിൻ്റെ ശാപമാണ്. തെരഞ്ഞെടുപ്പ് അടുത്താൽ പിന്നെ ഇത്തരം കാട്ടിക്കൂട്ടലുകളുടെ ബഹളമാണ്. സ്ഥിരമായ സ്ഥാനമാറ്റങ്ങളും തെരഞ്ഞെടുപ്പ് ചെലവും ജനാധിപത്യത്തിൽ പുതിയ മുഖങ്ങൾക്ക് ലഭിക്കാത്ത അവസരവും നാടിൻ്റെശപ്രമാണ്.
നമ്മുടെ രാഷ്ട്രീയരംഗത്ത് പദവിമാറ്റങ്ങൾ ഒരു സാധാരണസംഭവമായി മാറിക്കൊണ്ടിരിക്കുകയാണ്. നിയമസഭയിൽ നിന്ന് പാർലമെന്റിലേക്കും, പാർലമെന്റിൽ നിന്ന് വീണ്ടും നിയമസഭയിലേക്കും നേതാക്കൾ മാറുന്നതും പുതിയ കഥയല്ല. ഇത് നിയമപരമായോ ഭരണഘടനാപരമായോ തെറ്റല്ല. എന്നാൽ, ഈ മാറ്റങ്ങളുടെ സാമ്പത്തിക, സാമൂഹിക, ജനാധിപത്യപരമായ ആഘാതങ്ങൾ വളരെ വലുതും ഗൗരവമുള്ളതുമാണ്. പ്രത്യേകിച്ച് ഈ മാറ്റങ്ങൾ ജനങ്ങളുടെ പണത്തിൽ നടക്കുന്നുവെന്നത് മറന്നുകൂടാത്ത സത്യമാണ്. എങ്ങനെ വന്നാലും നഷ്ടം പാവം ജനത്തിന്.
തുടർച്ചയായ തെരഞ്ഞെടുപ്പുകളുടെ സാമ്പത്തിക ബാധ്യത
കാലാവധി പൂർത്തിയാകുന്നതിന് മുമ്പ് ഒരു നേതാവ് സ്ഥാനം മാറുമ്പോൾ പുതിയ തെരഞ്ഞെടുപ്പ് നടക്കേണ്ടിവരും. ഒരു മണ്ഡലത്തിൽ ഒരു തെരഞ്ഞെടുപ്പ് നടക്കുന്നതിന് കോടികൾ രൂപയുടെ പൊതു ധനം ചിലവാക്കപ്പെടുന്നു. ഈ പണം എന്തിനൊക്കെ ഉപകരിക്കപ്പെടുന്നതാണ് എന്ന് ആലോചിച്ചിട്ടുണ്ടോ?
• റോഡുകൾ നിർമ്മിക്കാൻ കഴിയുന്ന പണം
• ആശുപത്രികൾ മെച്ചപ്പെടുത്താൻ കഴിയുന്ന പണം
• സ്കൂളുകൾക്ക് സൗകര്യം വർദ്ധിപ്പിക്കാൻ ഉപയോഗിക്കാവുന്ന പണം
എന്നിങ്ങനെ വിവിധ പദ്ധതികളിലേക്ക് എത്തേണ്ട പണം തിരഞ്ഞെടുപ്പിന്റെ പേര് പറഞ്ഞ് ചെലവാകുകയാണ്.
ഇതെല്ലാം ജനങ്ങളുടെ നികുതി പണം ആണ് എന്നതാണ് ശ്രദ്ധേയം. ജനങ്ങൾ പണിയെടുത്ത് സമ്പാദിച്ച പണം.
ചോദ്യം ഉയരുന്നു:
സ്ഥാനമാറ്റത്തിന്റെ ചെലവ് ജനങ്ങൾ എന്തിന് വഹിക്കണം ?
പുതിയ മുഖങ്ങൾക്ക് അവസരം ഇല്ലാതാകുന്ന അവസ്ഥ
സ്ഥാനം മാറുന്ന നേതാക്കൾ പലപ്പോഴും അതേ രാഷ്ട്രീയ മേഖല പിടിച്ചുനിർത്തുന്നതാണ്. ഇതോടെ,
• പുതിയ രാഷ്ട്രീയ ചിന്തകൾക്ക് ഇടം ലഭിക്കില്ല
• യുവാക്കൾക്കും പുതിയ തലമുറക്കും രാഷ്ട്രീയത്തിൽ കടക്കാനുള്ള വഴി അടയുന്നു
• ജനങ്ങൾക്കുള്ള തിരഞ്ഞെടുപ്പ് വൈവിധ്യം കുറഞ്ഞുപോകുന്നു
ജനാധിപത്യത്തിന്റെ ആരോഗ്യം പുതുമയിലും പുതുചിന്തകളിലുമാണ്. ഒരു നേതാവ് നിരന്തരം സ്ഥാനങ്ങൾ മാറിക്കൊണ്ട് മത്സരിച്ചുകൊണ്ടിരിക്കുമ്പോൾ സംരംഭകരായ, വിദ്യാഭ്യാസമുള്ള, സത്യസന്ധമായ പുതിയവർ പ്രയത്‌നിച്ചാലും അവർക്കു വേദി ലഭിക്കാനില്ല.
ജനാധിപത്യത്തിന്റെ നിലനിൽപ്പ് ചോദ്യം ചെയ്യപ്പെടുന്നു
ജനങ്ങൾ നൽകുന്ന വോട്ടിന് പിന്നിൽ വിശ്വാസം, പ്രതീക്ഷ, ഭാവിയുടെ ഉറപ്പ് എന്നിവയുണ്ട്. പക്ഷേ, സ്ഥാനപദവികൾ വ്യക്തിപരമായ ഉയർച്ചയ്ക്കുള്ള പടിയായി മാത്രം ഉപയോഗിക്കുമ്പോൾ ജനപ്രാതിനിധ്യത്തിന്റെ അന്തർബോധം നഷ്ടപ്പെടുന്നു. ജനങ്ങളുടെ ഉത്തരവാദിത്തം കൂടുതൽ ശക്തമാകുന്നു
ജനങ്ങൾ ചോദിക്കേണ്ട കർശനമായ ചോദ്യങ്ങൾ:
പദവി മാറിയത് ജനങ്ങൾക്കുവേണ്ടിയോ, വ്യക്തിക്ക് വേണ്ടിയോ?
തിരഞ്ഞെടുപ്പ് ചെലവാകുന്നത് ആരുടെ പണം?
ഈ ചെലവ് സമൂഹത്തിന്റെ ഭാവിയിൽ എന്ത് പ്രതിഫലം തരുന്നു?
പുതിയവർക്കുള്ള വാതിൽ തുറന്നുനിൽക്കുന്നുണ്ടോ?
ജനങ്ങൾ പഠിച്ചശേഷം വോട്ട് ചെയ്താൽ മാത്രം ജനാധിപത്യം ആരോഗ്യവത്താകും.
പദവി ഒരു നേട്ടമല്ല, ഒരു ബാധ്യത ആണ്. ഓരോ പൊതുപദവിയും ജനങ്ങളോടുള്ള കരാറാണ്. അത് മാറുമ്പോൾ, അതിന്റെ ചെലവും ഉത്തരവാദിത്വവും വ്യക്തിയായ നേതാവ് ഏറ്റെടുക്കേണ്ടതാണ് — ജനങ്ങൾ അല്ല. ദേശത്തിന്റെ ഭാവി ഉറപ്പാക്കുന്നത് പദവി പിടിക്കുന്നവരല്ല, പദവിയിൽ നിന്ന് സേവനം ചെയ്യാൻ നിൽക്കുന്നവരാണ്.
