സ്മാര്‍ട്ട്‌ഫോൺ വിപണിയില്‍ 5ജി മോഡലുകൡലേക്ക് ചുവടുമാറുകയാണ് കമ്പനികള്‍. ഇന്ന് പുതിയൊരു മോഡല്‍ കൂടി ഇന്ത്യന്‍ വിപണിയിലെത്തിയിട്ടുണ്ട്. വണ്‍പ്ലസിന്റെ പുതിയ സ്മാര്‍ട്ട്‌ഫോണും ഇയര്‍ബഡ്‌സും ഇന്ത്യന്‍ വിപണിയില്‍ അവതരിപ്പിച്ചിട്ടുണ്ട്. വണ്‍പ്ലസ് നോര്‍ഡ് സിഇ 3 ലൈറ്റും വണ്‍പ്ലസ് നോര്‍ഡ് ബഡ്‌സ് 2-മാണ് വിപണിയിലെത്തിയത്. വയര്‍ലെസ് ഇയര്‍ബഡ്‌സ് ഏപ്രില്‍ 11 മുതലാണ് വിപണിയില്‍ ലഭിക്കുകയുള്ളൂവെന്ന് കമ്പനി അറിയിച്ചിട്ടുണ്ട്.
20000 രൂപയ്ക്ക് താഴെ വിലയുള്ള ഇടത്തരം 5ജി സ്മാര്‍ട്ട്‌ഫോണുകളുടെ വിഭാഗത്തില്‍ വലിയ മത്സരമായിരിക്കും ഈ മോഡല്‍ കാഴ്ചവെക്കുകയെന്ന പ്രതീക്ഷയിലാണ് കമ്പനി. സെല്‍ഫി ക്യാമറയ്ക്കും പ്രൊസ്സസ്സറിനുമൊക്കെ വലിയ പ്രാധാന്യം നല്‍കിയാണ് പുതിയ മോഡല്‍ വികസിപ്പിച്ചിട്ടുള്ളത്. വണ്‍പ്ലസ് നോര്‍ഡ് സിഇ3 ലൈറ്റ് സ്മാര്‍ട്ട്‌ഫോണിന് 19,999 രൂപയും വയര്‍ലെസ് ഇയര്‍ഫോണായ നോര്‍ഡ് ബഡ്‌സ് 2വിന് 2,999 രൂപയുമാണ് വില.
നോര്‍ഡ് സിഇ 3 ലൈറ്റ്
5ജി ഇടത്തരം റേഞ്ചിലുള്ള വണ്‍പ്ലസിന്റെ ഈ പുതിയ മോഡല്‍ വിപണി പിടിച്ചേക്കും. ഇക്കഴിഞ്ഞ വര്‍ഷം അവസാനം വണ്‍പ്ലസ് വിപണിയില്‍ എത്തിച്ച നോര്‍ഡ് സിഇ ലൈറ്റ് 2 വിനേക്കാള്‍ പല ഫീച്ചറുകളും ഈ മോഡലിലുണ്ട്. ഡിസൈനിലും ചാര്‍ജിങ്ങിലും അടക്കം എല്ലാം പഴയ മോഡലിന്റെ ഇരട്ടി ആകര്‍ഷണവും സവിശേഷതകളും നോര്‍ഡ് സിഇ 3 ലൈറ്റിന് അവകാശപ്പെടാന്‍ സാധിക്കും. രണ്ട് നിറങ്ങളിലാണ് നിലവില്‍ വിപണിയിലുള്ളത്. പാസ്റ്റല്‍ ലൈം, ക്രോമാറ്റിക് ഗ്രേ നിറങ്ങളിലാണ് ഇത് ലഭിക്കുന്നത്. കമ്പനിയുടെ വെബ്‌സൈറ്റിലൂടെ ഏപ്രില്‍ 11 മുതല്‍ വാങ്ങാന്‍ സാധിക്കും. വിവിധ ഓണ്‍ലൈന്‍ പ്ലാറ്റ്‌ഫോമുകളിലൂടെയും വില്‍പ്പനക്കെത്തും.
19,999 രൂപ വിലയുള്ള മോഡലിന് 8ജിബി/128ജിബിയാണ് സ്റ്റോറേജ്. 21,999 രൂപയ്ക്ക് 8ജിബി/256ജിബിയും സ്റ്റോറേജ് കപ്പാസിറ്റിയുണ്ട്. 5000 എംഎഎച്ച് ബാറ്ററിയും 67 വാട്ട് ഫാസ്റ്റ് ചാര്‍ജറുമാണ് മറ്റൊരു സവിശേഷത. മുന്‍മോഡലായ നോര്‍ഡ് സിഇ 2 ലൈറ്റിനേക്കാള്‍ ചാര്‍ജിങ് സ്പീഡ് ഇരട്ടിയാണ്. സെല്‍ഫി ക്യാമറ 16 എംപിയാണ്. പ്രൊസ്സസ്സര്‍ സ്‌നാപ്ഡ്രാഗണ്‍ 695 എസ്ഓസിയാണ്. 120 ഹെഡ്‌സിനൊപ്പം 6.72 ഇഞ്ച് ഫുള്‍എച്ച്ഡി ഡിസ്‌പ്ലേയാണ് മറ്റൊരു സവിശേഷത. പിന്‍ ക്യാമറ മൂന്നെണ്ണമാണ്. ( 108 എംപി+2എംപി+2എംപി). സ്റ്റീരിയോ സ്പീക്കര്‍ ശബ്ദത്തിന്റെ ഗുണനിലവാരം ഉറപ്പാക്കുന്നു. ഫ്‌ളാറ്റ് എഡ്ജ് ഡിസൈനാണ് കമ്പനി നല്‍കിയിരിക്കുന്നത്. ഇത് കാണുമ്പോള്‍ ഒരു സിമ്പിള്‍ ഫീല്‍ നല്‍കുന്നു. ഈ മോഡലിന്റെ ഗ്ലോസി ഫിനിഷിങ് എടുത്തുപറയേണ്ടതാണ്.
വണ്‍പ്ലസിന്റെ നോര്‍ഡ് ബഡ്‌സ് 2 വിപണിയില്‍
വണ്‍പ്ലസിന്റെ ഈ പുതിയ വയര്‍ലെസ് ബ്ലൂടൂത്ത് ഇയര്‍ഫോണ്‍ ഏപ്രില്‍ 11 മുതലാണ് വിപണിയില്‍ ലഭിക്കുക. ഒറിജിനല്‍ നോര്‍ഡ് ബഡ്‌സിനെ പോലെ കാണുമ്പോള്‍ തോന്നുമെങ്കിലും ഫീച്ചറുകള്‍ ഈ മോഡലിനാണ് കൂടുതല്‍. നോയിസ് ക്യാന്‍സലേഷനുണ്ട്. ശബ്ദത്തിന്റെ നിലവാരം കൂടുതല്‍ മെച്ചപ്പെടുത്തിയിട്ടുമുണ്ട് കമ്പനി. വയര്‍ലെസ് ഇയര്‍ബഡ്‌സിന് 12.44 എംഎം ഡ്യുവല്‍ ഡ്രൈവറുകളാണുള്ളത്. ബാസ്‌വേവ് മെച്ചപ്പെടുത്തുന്ന അല്‍ഗോരിതമാണ് നല്‍കിയിരിക്കുന്നത്. ഫാസറ്റ് ചാര്‍ജിങും. നോര്‍ഡ് ബഡ്‌സ് 2 വിന്റെ സവിശേഷതയാണ്.2999 രൂപയാണ് വില.
